كشف حساب
=========
فاتت سنه لازم نتحاسب
واعرف ايه منى اتحقق
وانا مش جايه ليكم اعاتب
وعاوزه اعرف من لسه بيخنق
كل م افرح القاه جايب
تهم وبلاوى وبكدب يلفق
امسك حرامى لو انت الحامى
وشيل قلاديشك من قدامى
روح وانزاح
واوعى تفكر
دم شهيدى
عدا وراح
واياك تغدر
ولسه مصابى
بعينه م ارتاح
تعمل عبيط او قرطاس
ام الشهدا عاوزه قصاص
لا مندسين ولاحتى حماس
او بلطجى او واد قناص
سيبك بقا من الألاعيب
لا انتخابات او مجلس فى الجيب
كش ياشايب واحسنلك عيب
هما يومين وشمسك هتغيب
زى ماسيدك عامل مستموت
وانت مفكر انى بافوت
اصحا وفوق
وغور بالزوق
وسيبنى وارحل زى فاروق
كشف حسابك تقل ويايا
وربى وشعبى كله معايا
مش ناسيالك كل تاريخك
بس كفاية كده توبيخك
سلم يالله ليا السلطه
كفايه سنه عدتنى اونطه
وسلم معاها كمان البدلة
كفاية اهانتها وشرف المهنة
واوعى تقول جيشى هيحمينى
ده مش جيشك
وقدام ربى مش هيغيتك
وهو بدوره له كشف حساب
وربنا عادل
عنده الرحمة وعنده عذاب
وعمر ماعدله عننا غاب
ولكل منا أجل و كتاب
ويا ملايكه على الابواب
قوم نتحاسب
امضاء : انا الثورة
.................
كلمات طارق ياسين
