لسه بدرى على الفرح
=============
لسه بدرى على الفرح
ياعرايس شيلوا الطرح
فى البداية خالد سعيد
ولسه دم كام شهيد
فى الميدان قام انطرح
وكام اتعمى وكام انجرح
لسه بدرى على الفرح
آه بدينا يوم جديد
ومستنيين زفاف وعيد
وياللى فكرك أوام سرح
واكتفيت وقلت حالنا انصلح
لسه بدرى على الفرح
لسه تارنا مع اللى خان
واللى سرق روح الميدان
واللى قتل حلمنا من زمان
واللى خلى عمرنا ف هوان
حس مرة انك انسان
لاتهان وعيش فى أمان
حس صوتنا اللى اتنبح
وشبابنا اللى اندبح
لسه بدرى على الفرح
ياعرايس شيلوا الطرح
لما فجر ييجى يوعد
لما الشهيد دمه يبرد
لما امه تاخد عزاه وتسعد
لما الجرذان تمشى وتبعد
لما طريقك يترسم على شيئ محدد
مش سوس بينخر ودايما يهدد
لما احس انا وانت باننا واحد
لما يقوى عزمنا وبقلب صامد
لما نبنى مجد مصربجهد جامد
ونحتسب بربنا هو اللى قادر وشاهد
ساعتها هبكون الفرح
والعرايس تلبس الطرح
لسه بدرى على الفرح
كلمات طارق ياسين
