بره وجوه 
=====

بره وجوه باكون متغرب
وكل مابعد ارجع اقرب
بره الناس على طول حاسدانى
على ايه مش عارف
وجوه انا والاهل نعانى
ودايما خايف
وارجع اعيد من تانى الكره
وغربه جوه وغربه بره
رايح جاى على الحبل وبارقص
امتى الوقعة ؟ صحيح مش عارف
والجوع يقرص
اوعى تفكر بره أمان
بره بتنسى إنك انسان
وجوه ياعينى على طول تعبان
وتشقى وبرضه تلاقى حرمان
قلت ياريتنى أنا م الاول
ماتغربت وعمرى اتحول
بعد الغربه ارجع ألاقى ناس غير ناسى
واغلط نفسى وأقول أنا ناسى
مانا فى الغربه كنت باقاسى
وارجع الاقى حاجه تحير
حتى فى لبسى مقاسى اتغير
وهو العمر طبيعى قصير
يمكن كنت على عيشتى أتكيف
مره مزاجى يكون مبسوط ومرة مقريف
وفى آخر المشوار
لاده نافع ولاده شافع
جوه او بره أكيد متغرب
وامتى يافجر هتيجى تقرب
طارق ياسين