إفرح واضحك يانيل
===========
بقالنا كتير نغم ضايع من المواويل
بقالنا كتير شجن زايد فى الاراغيل
حزين وحزنى مالى صفحتك يانيل
وعتمة مالية ضفافك بلا قناديل
حتى القمر مخنوق فى سماك ياليل
قلت أحلم
قلت أحلم بفجر جديد
قمت وثرت وأملى بربى يزيد
أطالب بحق وعدل وجنبى كام شهيد
وعزم رجال شديده وايد بتحضن ايد
جانا نهار
من الثوار
بيوعدنا بفجر جديد
ويبدأ لينا عهد سعيد
بصيت ولقيت الحلم بالميدان بيتحقق
وصوتى ناديت كما الرعد فى السما بيبرق
وطيور حرية فى العلا تغنى وتزقزق
لافيه خاين ولا فاسد ولا حد هنا بيسرق
وشمس جديدة جايلنا بأمل يشرق
يانيل قادت قناديلك
لاتخشى تانى من ظلام ليلك
دى فرحة جاية تناديلى وتناديلك
فافرح وإضحك يانيل
صبرنا كتير وصبرنا مش بالقليل
فافرح وارقص وغنى واضحك يانيل
كلمات طارق ياسين
